Fljúgandi furðuhlutir.

Nú styttist í hið árlega trambolín-flugi í Reykjavík.  Eins og nótt fylgir degi, fylgir trambolín flug fyrstu alvöru haustlægðinni.  

Fljótlega má búast við hverri fréttinni af annarri um fljúgandi trambolín og um bíla skemmdir af völdum þeirra. 

Útlit fyrir afar slæmt veður

Vinstri Grænir “runka míg í rímini”.

Það er ekki auðvelt að fóta sig á atvinnustefnu Vinstri Grænna, en það eitt er þó morgunljóst að þráhyggjan gegn stóriðju hefur ekki farið ekki fram hjá neinum.  Það má heldur ekki virkja, það skemmir náttúruna svo voða mikið, - nema margar litlar sætar virkjanir. Ekki má heldur gera neitt annað sem skaffar vinnu né annað sem er arðbært og skilar klinki í kassann hjá einhverjum. 

Hvað stendur þá eftir. Jú, - ein af þeim atvinnugreinum sem VG hafa sérstakt dálæti á er ferðaþjónustan.  Hins vegar verður ekki í fljótu bragði séð að VG hafi reynt að gera neitt til að auðvelda það, að hægt sé að reka hér á landi arðbæra ferðaþjónustu.

Hafa VG komið með einhverjar raunhæfar tillögur til að ferðaþjónustan verði rekin með ásættanlegri arðsemi?  Hverjar eru þær?  Hafa VG beitt sér fyrir því að einfalda býrokratíska eftirlitskerfið þannig að það sé ferðaþjónustunni ekki sá millusteinn sem nú er?  Hafa VG beitt sér fyrir lækkun á öðrum álögum á stéttina?  Hafa VG beitt sér fyrir því að lækka álögur á hópferðabíla, þannig að eðlileg endurnýjun geti átt sér stað?  Hvað annað er bitastætt í ferðamálaatvinnustefnu VG og hvernig á að fjármagna hana?  

Hver er síðan sýnilegur stuðningur VG?  Hvað stuðning fá þeir nú síðast frá ráðherra VG?  Jú, - hækka skattana á áfengi í fríhöfninni í Keflavík og færa þar með sölu þess varnings til erlendra flugvalla.

Það sem er opinbert, að VG eru á móti erlendu fjármagni, en gefa samt færi á því að þannig peningum verði smyglað inn í gegnum ESB og þverbrjóta í leiðinni heilögustu kosningaloforð sín um að ganga ekki í ESB.   

Kynjuð hagstjórn er VG sérlega þóknanleg og hægt að eyða milljónum í það verkefni svo framarlega að fjámunir koma af landsbyggðinni við að leggja niður kvennastörf í heilbrigðisgeiranum.  

Hverjar eru aðrar tillögur VG í öðrum atvinnumálum?  Hverju hafa þeir beitt sér fyrir en ekki gegn á Alþingi?  Spyr sá sem ekki veit.

Er von að manni verði við eins og pólsku vinnukonunni  ".....ég eggi skílúr tessir íslendingúr.  Teir rúnka míg í rímini…..” 

Það væri svo eftir öðru, að nýjasta útspil VG í atvinnumálum yrði: “að gera eitthvað annað, en eitthvað annað”. 

Orð í tíma töluð......

.....bíð spenntur eftir greininni í Morgunblaðinu. 

Búinn að vera að fjasa um þessi mál hér heima fyrir.  Einkaflug hefur hér dregist verulega saman.  Þetta ber allt að sama brunninum.  Einhverjir utanaðkomandi þurfa að sýna föðurlega umhyggju við allt og alla.  Það er gert til þess að menn fari sér ekki að voða.  Við núverandi fyrirkomulag aukast verulega líkurnar á því.  Í þeim farvegi sem þetta er í nú, sitja verklegar æfingar á hakanum.  Það er vegna kostnaðarins við að halda úti m.a. skrifstofubákni hjá Flugmálastjórn Íslanda.  Þar á bæ er verið að túlka allar reglur ESB í botn.  Litlar sem engar undanþágur gefnar, þrátt fyrir sérstöðu landsins.  Þar hafa þingmenn og ráðherrar samgöngumála brugðist.  Gleyptu allt regluverkið frá Bruxell hrátt, án þess að gera sér grein fyrir afleiðngunum.

Þetta virðist allt vera á eina bókina lært.  Einkaflugmenn eru bara skipimint ráðamanna og enn eitt lóðið á vogaskálarnarð til þess að auðvelda krötunum að henda skjóðunni með íslensku þjóðinni inn fyrir gullna ESB-hliðið.

Síðan tekur steininn úr, öll þessi gögn og umsóknareyðublöð eru á ensku.  Búum við ekki á Íslandi?  Er íslenskan ekki lengur tungumál okkar?

Óttast að einkaflug leggist af á Íslandi

"Er ekki rétt að doka við og sjá hvort þetta reddast ekki?"

Þetta virðist vera móttóið á Alþingi í dagsins önn. 

Alveg dæmaust hversu hægt gengur að koma einhverju í gang.  Ekki vantar hugmyndirnar, en pólitískur þroski virðist ekki vera fyrir hendi.  Fólkið á Alþingi Íslendinga virðast vera í einhverjum sýndarveruleika sem ekki er í neinni tengingu við lífið fyrir utan múrana. 

Hvernig væri að alþingismenn færu úr jakkafötunum, kuðluðu saman bindunum og girtu sig í brók.  Færu að  því loknu að leysa hnúta í stað þess að hnýta fleiri.

Ef ekki, - þá senda alþingismenn heim og láta hlutina þroskast í friði fyrir þeim.  Ástandið getur varla vesnað úr þessu.

Rótgrónum þankagangi þarf að breyta

Við borgum ekki.......

.....skuldir óreiðumanna í utlöndum.  Þessi orð eru í fullu gildi enn. 

Hvenær ætla núverandi stjórnendur landsins að skilja það?  Hlutverk ríkisstjórnarinnar er að verja hagsmuni þjóðarinnar.   Hvað þarf að ganga á til að þau átti sig á því?

Icesave ekki vísað til EFTA-dómstólsins

Þjóðvegarotturnar

Í Austurglugga 38.tbl. er enn ein langa greinin frá fulltrúum Fjarðalista í Fjarðabyggð um þjóðveg 1.  Nú liggur svo mikið við að það er tvímennt í skrifunum.  Furðuleg samsuða það, svo ekki sé dýpra í árina tekið.  Merkilegur stíll að tala um sjálfan sig í þriðju persónu, nema þau hafi valið að svara hvort fyrir annað.  Það er þá ekki síður athyglivert. 

Farsælast fyrir þau, að mati bloggara, hefði verið að hafa tvær sjálfstæðar greinar í Austurglugganum þar sem hvort um sig skrifaði undir sínar athugasemdir.  En þetta er ef til vill nútíminn í pólitíkinni.  Annað sem vekur ekki síður athygli, er að lítið fréttablað skuli ekki takmarka lengd aðsendra greina.  Um þetta svar Fjarðalistans hefði mátt komast af með mun minna lesmál, án þess að rýra skemmtanagildið nokkuð skapaðan hlut.

Aftur að ritsmíðinni.  Í þeirri skemmtilegu langloku er aftur verið að grípa í síðasta hálmstráið til að vera á móti endurbótum á Öxi með því að fjalla enn um lélegt GSM samband á þeirri leið.  Bara rétt til að upplýsa það hér, þá er það ekki vandamál,  - einungis verkefni að leysa.  Minni einnig á að það eru ekki nema nokkur misseri síðan gott GSM samband varð að veruleika á Fagradalsbrautinni milli Egilsstaða og Búðareyrar.  Fram að þeim tíma var mjög stopult GSM samband frá Hnútu og niður í Grænafell.  Það vita þeir sem oft fara þá leið.  

Þeir sem fara um Öxi vita einnig, að þar er víða þokkalegt GSM samband, þó vissulega séu þar stórar gloppur sem þarf að bæta.  Er ekki möguleiki á því, að GSM sambandið verði komið í viðunandi horf um það leiti sem bættur vegur um Öxi verður að veruleika?   Hafa bæjarfulltrúar Fjarðalistans hugleitt það?

Um Öxi liggur raflína, sem hugsanlega gætu auðveldað rekstur GSM sambands þar.  Samskonar búnaður á Fagradal fær hins vegar raforku sína frá díselvélum.  Ástæða þess er að ekki náðist samkomulag við einn landeigendann um að leggja raflögn um land hans að stöðinni.  Sá eindregni náttúrusinni vill fekar sjá innflutta olíu nýtta með tilheyrandi loftmengun, en að gefa færi á að sjá stöðinni fyrir hreinni orku af landsnetinu.  Svona er nú margt skrítið í kýrhausnum, - en það eru nú allt önnur saga.

Síðan kemur gullkornið í greininni.  Þar koma þessir fulltrúar Fjarðalistans með tímamóta játningu, þvert á það sem á undan er gengið.  Þar upplýsa þau um stuðning sinn við allar samgöngubætur í fjórðungnum.  Þar vantar hugsanlega smáræði upp á sannleikann.  Nefnilega þann, að höfundar greinarinnar styðja heilshugar allar samgöngubætur í fjórðungnum, - svo framarlega að þær séu í Fjarðabyggð. 

Og rúsinan í pylsuendanum, þó í miðri grein sé.  Þar er því lýst sem fjarstæðu, að nokkur bæjarfulltrúi í Fjarðabyggð telji ógn af Öxi.  Hafa þau ekki heyrt Guðmundar Þorgrímssonar getið? 

Annað hvort vita greinahöfundar ekki betur, eða það sem verra er,  þau eru viljandi að skauta hjá sannleikanum.  Ef kjörnir fulltrúar lenda inn á þá braut, víla þeir ekki fyrir sér að nýta þessa sérstæðu hæfileika sína í öðrum málum.  Það er alvarlegt mál og til umhugsunar fyrir kjósendur  viðkomandi flokks.

Lesa má, sér til skemmtunar, umrædda grein Fjarðalistans á heimasíðu þeirra http://www.fjardalistinn.is/

Er Agl.is í andaslitrunum?

Vona ekki.  En, - er von að þeirri hugsun skjóti niður?

Nú 17. sept. er nýjasta fréttin á Agl.is dagsett 15. sept. Þrátt fyrir stórfrétt frá Borgarfirði Eystri um að Fiskverkun Kalla hafi sagt upp öllu sínu starfsfólki og hefur í hótunum við Matvælastofnunina. http://www.mbl.is/mm/frettir/innlent/2010/09/16/krefst_opinberrar_rannsoknar/. 

Það er miður ef þessi miðill er að drabbast niður. – mjög miður.

Ummælakerfið hjá Agl.is hefur einnig verið úti á annan sólahring, en það er ef til vill í lagi, lítil umfjöllun þar og rýr eftir að innskráningu á það var krafist.  Það er slæmt, vegna þess að oft komu þar inn góðar og gildar ábendingar frá einstaklingum, sem ekki vildu láta nafns síns getið. 

Það á ekki að láta þær ábendingar gjalda þess að nokkrir, sem ekki hafa þroska til að halda sig á málefnalegum nótum og í skjóli nafnleyndar eru í persónulegu skítkasti.  Þessir einstaklingar eru ekki í fullkomlega andlegu jafnvægi og verða alltaf aumkunarverðir hvort eð er.  Slíkum athugasemdum má farga.  

Hvað er að rafkerfinu?

Þetta er farið að verða ansi þreytandi, þegar vandamál eru á Grundartanga þá skuli rafmagnið undantekningalítið jafnframt fara af á Austurlandi og víðar.  Um daginn var rafmagnslaust í um klukkustund á Austurlandi og fyrr á árinu var ljóslaust í rúmar tvær klukkustundir. 

Er þetta nútíminn?  Eða eru menn komnir of langt í að hagræða?  Er ekki nægur mannskapur til að bregðast við, til að stytta tímann sem rafmagnslaust er? 

Annað sem vekur athygli.  Þegar rafmagnslaust er í Reykjavík í einhverju hverfinu í 10 mín, eru því gerð góð skil í fréttatímum.  Fulltrúar rafveitunnar spurðir í þaula.  Kemur þetta fyrir aftur?  En - þegar rafmagnslaust er klukkustundum saman á landsbyggðinni, þá er hlaupið á hundavaði yfir það í fréttatímanum, ef fréttamenn leggjast þá á annað borð svo lágt að minnast á það í fréttatímanum og reyna að leita skýringa.

Hvað veldur?  Hagræðing og fækkun fréttamanna á landsbyggðinni?

Raforkukerfið komið í eðlilegt ástand á ný

Jenis av Rana er minn maður....

...ekki það að ég sé sannkristinn, öðru nær, heldur vegna þess að mér finnst menn eiga fullan rétt á að standa við sína sannfæringu.  Ef einhver haldbær rök eru fyrir afstöðu viðkomandi, þá er honum frjálst að viðra þær og standa við.  Þetta er nú einu sinni partur af lýðræðinu og málfrelsinu, sem við berum fulla virðingu fyrir.  Stundum svíður undan, en það verður þá bara að hafa það.

Segir Færeyinga skammast sín

Axarskaft Kristjáns Þórs Júlíussonar?

Ráðamenn í Fjarðabyggð hafa farið mikinn undanfarið og krafist færslu á þjóðveginum án þess að nokkur haldbær rök fylgi.  Helst er að skilja að lægra vegnúmer skili fleiri ferðamönnum án þess að geta skýrt það hvers vegna vegur 939 um Öxi er með umtalsvert meiri umferð en Þjóðvegur 1 um Breiðdalsheiði (www.vegagerdin.is) og skv. heimasíðu Steinasafns Petru á Stöðvarfirði eru gestir þar um og yfir 20.000 árlega.  Einnig hefur oft heyrst að Fagridalur sé slíkt veðravíti að Oddskarð sé hreinn barnaleikur í samanburðinum.  Núna hentar hins vegar að tala um að vegurinn liggi allur á láglendi frá Hornafirði til Héraðs, þrátt fyrir að Fagridalur sé hátt í fjögur hundruð metra hæð yfir sjó.

Það er síðan dásamlegt, þegar einn þingmaður kjördæmisins, Kristján Þór Júlíusson, kemst óvænt að því að það er eitthvað lífsmark austan Vaðlaheiðarinnar og ekki síður er það gleðilegt að hann skuli taka frá stund til að mæta á fund um þau mál sem hvað brýnast brenna að baki sumra Austfirðinga.  Auðvitað er maður snortinn af því, að umræddur þingmaður skuli á einni kvöldstund átta sig á því, að eitt brýnasta framfaramál í fjórðungnum skuli vera það að færa Þjóðveg 1 frá Breiðdalsheiði um firði til Héraðs. 

Í aðdraganda alþingiskonsinga 2006 hélt Kristján Þór úti heimasíðu og þar kom fram aldeilis metnaðarfull greining hans á samgöngumálum kjördæmisins.

"Samgöngumál
Ég tel bráðnauðsynlegt að halda áfram að bæta samgöngur innan kjördæmisins og ekki síður milli þess og annarra landshluta. Hér bíða fjölmörg brýn verkefni sem ég mun fjalla sérstaklega um annars staðar hér á vefsíðu minni en margir munu kannast við baráttu mína fyrir hálendisvegi milli Akureyrar og Reykjavíkur, Vaðlaheiðargöngum og flugsamgöngum milli Akureyrar og Reykjavíkur og fyrir beinu flugi til útlanda frá Akureyri." 

Eftir nokkur skeyti okkar í milli á netinu hvarf þessi kafli og áherslur í samgöngukaflanum náðu þar eftir örlítið út fyrir Eyjafjarðasvæðið.  Sérstaka athygli vekur að þingmaðurinn tók sérstaklega fram bættar samgöngur.  Ekki er hægt að skilja að í því felist að lengja leiðir, þvert á móti má skynja að bættar samgöngur og stytting sé keppikeflið, - a.m.k. í tíma, eða átti þingmaðurinn eingöngu við samgöngur til og frá Akureyri?

Það hlýtur því að vekja nokkra furðu, þegar þingmaðurinn opinberar skoðun sína um að heppilegt sé að færa Þjóðveg 1 á Austurlandi um firði með tilheyrandi lengingu.  Oftast eru menn sammála um að bæta og stytta leiðir.  Í þessu tilfelli hefði verið nær að fjalla um að færa Þjóðveg 1 í fyllingu tímans, þannig að hann mundi liggja um Öxi og stytta þar með hringveginn umtalsvert.  Þessar nýju áherslur hljóta að vekja menn til umhugsunar um legu Þjóðvegar 1 í víðara samhengi.  Á t.d. með bættum samgöngum út Eyjafjörð, að færa Þjóðveg 1 þannig að hann verði skilgreindur um Siglufjörð, en ekki um Öxnadalsheið, sem þó liggur nokkrum metrum hærra en vegur um Öxi og liggur þar að auki hjá garði nokkurra stórra bæjarfélaga á Tröllaskaganum. 

Tilviljun að nöfni heiðanna skuli vera svo lík, en það skýrir ef til vill ruglinginn í  þingmanninum.  Það er einnig athyglivert að hann skuli kjósa að stilla sér svona ákveðið upp með öðrum hópnum í svo viðkvæmu hitamáli. 

Í Austurglugganum er mynd á forsíðu af þingmanninum, hvar ekki fer á milli mála skoðun hans á málinu.  Er Austurglugginn ef til vill að oftúlka orð þingmannsins?  Hvor er sekur um axarskaft í sínum vinnubrögðum, Austurglugginn eða Kristján Þór Júlíusson?