Benedikt V. Warén

26.3.2020 | 10:02

003 Hin gáttin til Íslands er AUSTURLAND

ADS-B flugstjórnarkerfi

Nýtt kerfi til flugstjórnunar er skammstafað ADS-B og kemur í stað ratsjár, sem hefur verið nýtt um áratuga skeið við stjórnun flugs og skipaumferðar. ADS-B kerfið nýtir merki frá GPS gervitunglum og þekur mun stærra svæði og gefur betri yfirsýn fyrir flugstjórnir en núverandi ratsjárkerfi. Ratsjáin verður þó ekki aflögð í náinni framtíð þar sem hún mun áfram hafa hernaðarlegt gildi.

Munurinn á þessum kerfum er í aðalatriðum sá, að ratsjáin sendir frá sér merki, sem endurkastast af föstum hlutum til baka á upphafsstað og fæst þannig miðun á stefnu, hæð og fjarlægð hlutarins.

ADS-B kerfið vinnur hins vegar með GPS merki og nýtir sömu upplýsingar og tækin um borð í flugvélunum og senda boð um staðsetningu í gegnum jarðstöðvar til flugstjórnamiðstöðva .

Egilsstaðir eru mjög vel í sveit settir með tillit til gervitungla og þar að auki er starfrækt GPS leiðréttingastöð á vegum ISAVIA innan fjallahrings Fljótsdalshéraðs, sem gengur undir nafninu EGNOS. Tvær slíkar eru á Íslandi, hin er á Reykjanesi.

Kerfi þetta gagnast vel fyrir nákvæmnisaðflug að Egilsstaðaflugvelli og með uppsetningu tveggja ADS-B jarðstöðva á Héraði væri hægt að varpa mynd af aðflugi flugvéla, sem eru með þennan búnað, inn í flugstjórnarmiðstöðina og er vélin sýnileg þar til flugmaðurinn slekkur á kerfinu á flughlaði.

Airport city / Aerotropolis

Byggingar á Egilsstaðaflugvelli eru í grunninn frá 1959 og vegna sífellt hertari krafna um aukin öryggissvæði í kringum flugbrautir, líður senn að því að núverandi byggingar verði að víkja. Húsakosturinn hamlar jafnframt uppbyggingu og hertari kröfum um þjónustu innanhúss og gera auk heldur hlutina önugri við að koma upp heppilegu svæði fyrir flugvélastæði.

Það er því tímabært að huga að heildstæðu, metnaðarfullu framtíðarskipulagi flugvallarins og kanna hvaða möguleikar eru þar og hvernig við viljum sjá framtíðina tengda Austfjörðum og hvaða möguleika flugvöllurinn hefur inn í lengri framtíð.

Með glæsilegri nýbyggingu væri hægt að sækja á ný mið. Fjölbreytta þjónustu má fá með því að reisa stóra flug-, verslunar-, þjónustu- og ráðstefnumiðstöð og koma þar öllu þannig fyrir að hægt verði að vinna innandyra að ýmsum verkefnum þar sem menn leiða saman hesta sína í viðskiptalegu tilliti, þvert á Atlantsála. Fámennið, næðið og kyrrðin gæti verið sá segull sem margir kunna að dragast að auk afþreyingar utan dyra og sú staðreynd að stutt er í víðernin austanlands.

Í flugklasanum (nr. 7 á korti 001 Hin gáttin...) verði stórt hótel, ráðstefnusalir, fjölbreytilegir matsölustaðir, góð aðstaða fyrir afþreyingu og heilsubót, verslanir, bílaleigur, bíó og samgöngumiðstöð Austurlands.