Ágæti þingmaður

Það er eflaust að bera í bakkafullann lækinn að koma með tillögu á staðsetningu á aukaþyrlusveit landhelgisgæslunnar, þar sem ákveðnar hugmyndir virðast nú vera rétt handan við hornið, ef marka má fréttir í fjölmiðlum. Læknar hafa enn og aftur hvatt til þess að þyrlur verði staðsettar á landsbyggðinni og ekki er hægt að vera meira sammála þeim samþykktum. 

Þeir eru hins vegar fastir í að staðsetja fyrstu þyrluna á Akureyri, sem er illskiljanlegt.  Þeir líta eingöngu á þyrlur sem tæki til sjúkraflugs en þyrlur eru fyrst og fremst heppilegar til björgunarstarfa við erfiðar aðstæður en geta nýst ágætlega til flutninga á sjúklingum um styttri veg.
 

• Ég vil benda á Egilsstaðaflugvöll sem valkost fyrir þetta verkefni og í því samhengi hef ég látið teikna inn á meðfylgjandi kort 200NM radíus út frá Reykjavík, Akureyri og Egilsstöðum. . Rauði fleygurinn er ávinningurinn að hafa þyrlu á Akureyri, umfram Egilsstaði.  Blái fleygurinn er ávinningurinn að hafa þyrlu á Egilsstöðum umfram Akureyri.  Þar sést gjörla hvar ávinningurinn er meiri í drægi, að því gefnu að alltaf verði þyrlur staðsettar í næsta nágrenni við Reykjavík

 

• Suður af landinu eru einnig helstu siglingaleiðir fraktskipa og megnið af flugleiðum til og frá Íslandi liggja einnig þar um. Nörræna siglir suð austur af landinu og þetta er það svæði sem flest skemmtiferðaskip eiga leið um ár hvert.

Tekið skal fram að þetta er ekki vísindaleg úttekt, en gefur tilefni til þess að kanna nánar þessa tvo þætti, sem taka þarf tillit til við ákvörun um staðsetningu þyrlunnar.  Nánari rannsóknir þarf að framkvæma með tilliti til flugumferðar í samráði við Flugstoðir ohf og afla upplýsinga um siglingaliðir ferja og fraktskipa, sem eru væntanlega til í gögnum Landhelgisgæslunnar. 

Staðsetning björgunarþyrlu og starfsstöð Landhelgisgæslunnar eru um margt ákjósanleg á Egilsstaðaflugvelli. 

1.      Sjónflugleiðir frá Egilsstöðum eru góðar út á sjó, Héraðsflóinn, Fagridalur og Öxi.  Ekki má gleyma vaxandi umferð um hálendi norð-Austurlands og slys vegna óhappa, m.a. á hópferðabifreiðum þar og á þjóðvegi eitt um hálendi Austurlands. 

2.      Upp hafa komið tilfelli þar sem ekki hefur reynst unnt að fljúga þyrlum frá Reykjavík til leitar og björgunar, sem hefðu tekið fullan þátt í aðgerðum með staðsetningu á Egilsstaðaflugvelli.  

3.      Ég bendi á að um Egilsstaðaflugvöll er mikil flugumferð og í ljósi atburða fyrir skömmu, þegar Fokker flugvél Flugfélagsins varð að lenda þar með annan hreyfilinn dauðan, þarf ekki ríkt ímyndunarafl til að sjá að þá má á ekki mikið út af bera  til þess að flugvöllurinn lokist.   

4.      Ef flugvél brotlendir á flugvellinum þá er líklegast að vellinum verði lokað og þar með er ekki hægt að lenda venjulegum flugvélum á vellinum til  ná í sjúklinga.  Þyrlur geta þrátt fyrir það athafnað sig á svæðinu.   

5.      Næsta aðgerðasjúkrahús er á Norðfirði og það tekur þyrlu um 15 mínútur að fara þangað með slasaða  en um klukkustund tekur að fara þessa leið í sjúkrabíl.  Þar er einnig flugvöllur til að ná í sjúklinga, ef flytja þarf þá annað, t.d. til Reykjavíkur.   

6.      Verði óhapp á Akureyrarflugvelli, er einungis um fimm mínútna akstur á mun betra og fullkomnara sjúkrahús en hægt er að státa af, - í öllum Austurlandsfjórungi.  

Ég vil einnig vekja athygli á eftirfarandi: 

A.     Engin sjúkraflugvél er staðsett á Egilsstaðaflugvelli, þrátt fyrir um 10.000 manna byggð innan áhrifasvæðis flugvallarins og lengst að fara á bestu sjúkrahús landsmanna.  Þetta er þó talið nauðsynlegt í Vestmannaeyjum, þar sem flugleiðin er 57NM á Reykjavíkurflugvöll með allar öflugustu vélar í Íslenska flugflotanum og björgunarþyrlur tiltækar. 

B.     Á Ísafirði er einnig talin þörf á sjúkraflugvél. 

C.     Öflugasta sjúkrflugvélin er staðsett á Akureyri. 

D.     Á Ísafirði, Akureyri og Vestmannaeyjum eru öflugar sjúkrastofnanir en ég tel einsýnt að  sjúkrastofnun á Austurlandi standi þeim öllum langt að baki. 

E.     Það er hins vegar staðreynd, að bestu búnu sjúkrahús landsins eru í Reykjavík, næstbest búna á Akureyri og síðan slappast þetta allt niður í kofaþyrpingu eins og á Egilsstöðum, þar sem menn skilja bara ekker í því að enginn læknir viji ráða sig til starfa.   

F.      Það er líka staðreynd, að nær öll sjúkraflug eru til Reykjavíkur.  Örfá eru til Akureyrar og þar af eru flutningar með sjúka á milli sjúkrahúsa, sem ekki eru eiginleg sjúkraflug.  

G.    Ég bendi jafnframt á það, ef talin er þörf á að staðsetja flugvél á Ísafirði og í Vestmannaeyjum, hljóta að gilda sömu rök fyrir Austurland, sem er lengst frá hátækniþjónustu sjúkrahúsanna.   

H.     Hvernig reka á sjúkraflug og heilbrigðisþjónustuna er mat til þess bærra manna. Það eru sömu "sérfræðingarnir" sem eru ráðuneyti heilbrigðismála til ráðgjafar um starfsemi vítt og breytt um Ísland og það ráðurneyti stjórnar, merkilegt nokk, einnig heilbrigðismálunum hér á Austurlandi.  Því hljóta sömu rökin að gilda.

Ps. Þessi grein birtist í Morgunblaðinu í dag 3.mars, án þess að kortið fylgdi.  Þess vegna er hnykkt á þessu aftur hér.