Flugvöllurinn fer náttúrulega ekki fet.

Einkennileg smáborgaraháttur að skilja ekki að Reykjavík er höfuðborg Íslands, ekki eingöngu Stór-Reykjavíkursvæðisins.  Því ber borgarstjórnendum skylda til að hátta samgöngm þannig, að tími og kostnaður þeirra er borgina sækja, verði í lágmarki.

Það er nú þegar ærinn kostnaður sem leggst á landsbyggðina, vegna offjárfestinga og útrásar íbúa þessa svæðis.  Reykjavíkurborg hefur undanfarið verið rekin eins og sjálfstætt borgríki og það að verulegu leiti á kostnað landsbyggðarinnar.

Einar hrósar Ögmundi

Kominn úr sumarfríi frá Finnlandi.

Heitir og bjartir dagar eru að baki í Finnlandi.  Þar var hitinn +24 til 32°C var það kærkomin uppbót eftir +0 til 8°C á Egilsstöðum undanfarnar vikur fyrir ferðalagið.  Í Finnlandi áttum við hjónin ánægjulegar stundir í húsbílnum okkar, IngMar, bæði á landareign Völlu systur og mannsins  hennar Mårten jafnt og á tjaldstæðinu í Helsingfors. 

Undanfarin ár hafa farið í að kanna ókunnar lendur í austur, mið og vestur Finnlandi á húsbílnum og margar borgir kannaðar og margir vegir eknir.  Núna var ákveðið að vera ferðamaður í Helsingfors. 

Tjaldstæðið er vel staðsett í austurhluta borgarinnar rétt hjá neðanjarðarstöð þar sem lestar báru mann á örskotsstundu niður í miðborgina.  Húsbíllinn stóð og vaktaði svæðið á meðan við hjónin skoðuðum merka staði s.s. Dómkirkjuna, torgið, miðbæinn og aðra ferðamannastaði.

Þegar heim var komið, flýttum við óvænt för og í stað þess að leggja í hann suðurum á laugardegi, var ákveðið að slá í klárinn rétt eftir hádegi á föstudag.  Ekið var sem leið lá út úr bænum og eftir smá töf á suðurlandsvegi, vegna umferðaróhapps, var vistöðulítið ekið heim á leið. 

Merkilega nokk, þá benti ég frúnni á hve dökk Múlakvísl væri en sakleysisleg og frekar vatnslítil.  Þetta var um 17:00 á föstudaginn 8. júl sl.  Nokkur brennisteinsfnykur barst inn í bílinn á þessu svæði.

Það voru samt nokkuð óvæntar fréttirnar að mogni þess níunda þegar svefndrukknir ferðalangar drögnuðust á fætur og á öldum ljósvakans bárust þau tíðindi að brúin á Múlakvísl væri brottnumin og þjóðvegur 1 suður, ófær. 

Svona er Íslandi í dag, óvæntar uppákomur daglegt brauð.

Ekkert heyrðist á Egilsstöðum...

....í nokkrar skukkustundir, hvorki á rás1 né rás2 á FM. Þetta mun hafa verið mun víðáttumeira en mbl.is greinir frá.

Bilun í útsendingabúnaði Rúv

Fyrring.

Sirkusinn er kominn í bæinn enn eina ferðina.  Sjónhverfingarnar eru endalausar.  Allt kerfið hrunið.  Peningarnir horfnir.  Fyrirtæki falla hvert af öðru.  Heimilin mörg hver eins og rjúkandi ruslahaugar.  En samt er hægt að standa við samning um 100.000.000.00 séreignalífeyrissparnað til handa eins þeirra sem vafi leikur á að hafi hreint mjöl í pokahorninu, svo ekki sé dýpra í árina tekið.

Fjöldi einstaklinga fá engar lausnir, þrátt fyrir að hafa í einu og öllu farið eftir leikreglum fjármálasirkussins.

Svo ruslast Hæstiréttur inn á völlinn með atriði, sem ekki er hægt annað en að gapa yfir.  Ekki það að það komi beinlínis á óvart, en ennþá gengur Hæstiréttur fram af manni. 

Er hægt að skrumskæla réttlætið meira en gert er í græna húsinu aftan við Ingólf?

Máli gegn Halldóri vísað frá

Heildaruppstokkun skattkerfisins!

Innbyggt er í núverandi skattkerfi landsbyggðarfjandsamleg stefna.  Þetta hefur viðgengist í mörg ár og eru þar allir stjórnmálaflokkar jafn sekir.  Virðisaukaskatturinn er þar alverstur vegna þess að hann leggst á síðasta stigið í skattkerfinu.

Sem dæmi get ég nefnt  þegar ég um daginn var að lesa orkureikninga mína og rak þá upp stór augu.  Það var skattur á orkunni hjá Orkusölunni og annar reikningur frá RARIK með skatti á flutningi.  Það sem stakk hins vegar í augun var virðisaukaskattur á skattinum.  Segi og skrifa það var virðisaukaskattur á skattinum. 

Virðisaukaskattur er lagður á þann virðisauka sem til verður við umsýslu á vöru og álagningu söluaðila.  Seint verður hægt að rökstyðja það að skattur geti aukið verðmæti vörunnar þannig að réttlætanlegt sé að leggja á skattinn virðisaukaskatt.

Þessi aðferð er dæmi um aukaskattbyrgði þeirra sem enn vilja halda tryggð við heimahagana, byggja sér ból, eiga heima þar sem þeim líður vel. 

Þessu verður að breyta þannig, að fjármunirnir stoppi á þeim stöðum sem þeirra er aflað og þá kemst á jafnvægi í byggðum landsins.  Byggðastofnun  og Jöfnunarsjóður verða í framhaldi óþarfar stofnanir og aðrar sértækar björgunaraðgerðir óþarfar.  Þessar stofnanir og björgunaraðgerðir stjórnvalda, eru og verða ávallt mislukkaðar aðgerðir, eins og ótal dæmi sanna.

Til þess að þetta getur orðið, verður að bylta skattkerfinu og gjörbreyta.  Öll skattinnheimta verði í höndum bæjar- og sveitarfélaga, sem síðan  greiða í einn sjóð skv. höfðatölu, öll sömu krónutölu á hvern einstakling. 

Sá sjóður er ríkissjóðurinn og sér hann m.a. um að reka Alþingi með 15 alþingismönnum, sem sjá um lagasetningu.  Þeirra verkefni verður að setja lög og fylgjast með að þeim lögum sé framfylgt.  Ekkert annað.  Allri hagsmunagæslu verði stungið undir stól og hagsmuna- og kjördæmapot verði ekki liðið.  Ríkisstjórnin sér um að allt fari fram með ró og spekt.  Þing og þjóð vinni saman eins og smurð vél.   Ágreinigsmálum sveitarstjórna verði vísað til hennar og hún látin úrskurða, sé dómstólaleiðin ekki fær.

KERFIÐ, eins og það er, hefur ekki virkað í mörg ár.  Það þarf að koma framkvæmdavaldinu til fólksins, en ekki láta það í hendur fárra eins og nú er.  Óbreytt ástand er bara  ávísun á áframhaldandi spillingu.  Spillingu, sem hefur verið landlæg hér í áraraðir og afleiðingarnar æpa á mann hvert sem litið er.

Vilja breyta skattkerfinu

Þjóðlegra getur það vart orðið....

....að minnast árstíðar Jóns forseta með ítlalskri matarmenningu, - eða hvað? 

Heppilegra hefði verið ekta "smörrebröd og frikadeller" sem Jón heitinn hefur sennilega sporðrennt, frekar en pizzum.

Sá gamli hefur allavega blásið á þetta framtak. 

Strekkingurinn felldi pizzutjaldið

Ömulegur tviskinnungur í VG.

Ekki dettur mér augnablik í hug að verja það að hingað komi erlendir erindrekar til að leggja snörur fyrir ungmenni til hernaðarstarfa.  En er hægt að banna stofnunum að kynna starfsemi sína?  Hvað segja menn ef fjölpóstur frá þeim sömu berast til þessara ungmenna.  Er líka bannað að senda fjölpóst?

Hins vegar get ég ekki orða bundist, að verða ítrekað minntur á það að hernaðarbrölt virðis síður en svo vera VG á móti skapi.  Nú í síðustu viku voru hér herdeildir sem lögðu landið, miðin og lofthelgi undir sig til æfinga.  VG var í ríkisstjórn síðast þegar ég vissi og ekki er nema mánuður síðan VG ályktuðu um að segja segja upp samningum við NATO.  Á sama tíma er með þögninni samþykkt að fara með hervaldi til höfuðs Gaddafi.

Ég er ekki að ná því að fylgja stefnu VG.  En mér er sjáfu sér engin vorkunn, Steingrími J Sigfússyni tekst það ekki heldur.

En aftur að framhaldsskólunum.  Ungt fólk er það upplýst, að það getur sjálft ákveðið hvar það vill leita hófanna í menntun og ekki síst í atvinnutækifærum.  Lítið er um fína drætti á meðan VG sitja við stjórnvölinn.  Fólk flykkist úr landi í atvinnuleit.  Loforð um verklegar framkvæmsir sviknar og nú síðast "gleymdist" að taka fyrir og lagfæra lagaumgjörð um leit að olíu á Drekasvæðinu.  Mér segir sá hugur að það þyki rumpuliðinu í VG ekki verra.

Greinilegt er að VG er einungis að leggja í til heimabrúks.  Þetta er sama gamla sullið.  Gamalt vín á nýjum belgjum.

Herkynningar verði bannaðar

Skemmtilegur rugludallur Árni.

Hverjir er samþykkir heræfingum á Íslandi ár eftir ár??  Eru það ekki VG?

Af hverju stoppa þeir þessar æfingar ef þeir meina eitthvað með því sem þeir segja og/eða samþykkja?

Er VG ekki í ríksstjórn?  Er ég búinn að missa af einhverju?

Hvað með hjáróma píp VG um að segja sig úr NATO?

Hverslags vinnubrögð eru þetta í Árna?  Eru þessar yfirlýsingar einungis til heimabrúks, til þess að reyna að sýnast eitthvað? 

Það er eitt að sýna tennurnar þegar það á við og annað að sjá menn eins og Árna Þór Sigurðsson, að verða uppvísir að sýna alsberan góminn trekk í trekk í pólitískum tilgang.

Óviðeigandi að leita að „fallbyssufóðri“ hér á landi

Gaman að sjá loks þingmenn vinna....

...með meirihluta þjóðarinnar.  Það gekk þó ekki hljóðalaust fyrir sig.  Nokkrir löðrungar og þá skildi ríkisstjórn Ísands að lokum að það er þjóðin sem hefur síðasta orðið í veigamiklum málum.  Ekki nokkrir veruleikafirrtir ráðherrar í ríkisstjórn, sem er með minnsta mögulega meirihluta að bak sér.

Órofa samstaða um málsvörn

Og þetta gekk glatt fyrir sig....

....þrátt fyrir aðvaranir Steingríms fyrir nokkrum mánuðum, um að allt færi hér til fjandans er við samþykktum ekki Icesave.  Var þá eftir allt, ekkert að marka varnaðarorð ráðherrans?

Skuldabréfaútgáfa vekur athygli