Bloggfærslur mánaðarins, september 2011

Ráðherralarfarnir....

 

... eru sýndir ef eyða á nokkrum þúsundköllum í endurbætur eða rekstur í heilsugeiranum á landsbyggðinni.  Síðan klæðast þessir sömu ráðherrar í kjól og hvítt og lofa milljörðum í HÁTÆKNISJÚKRAHÚS VIÐ HRINGBRAUT, þegar þeir standa frammi fyrir kjósendum sínum í Reykjavík. 

"Hvað viltu heyra?  Ég lofa því að framkvæma það".


Ömulegt upp á að horfa.


Ráðherrar hafa uppi stórkallalegar og fáránlegar hugmyndir um byggingu ofursjúkrahússins við Hringbraut.  Þessi áform eru ekki í nokkru samræmi við heilbrigðismálin í heild sinni né núverandi stöðu ríkissjóðs hvað þá að vera í einhverjum takti  við heilbrigða skynsemi.   

Það virðist hins vegar ekki hamla framkvæmdagleðinni né virðist skortur á fé vera vandamáli í þessari óraunhæfu spilaborg.  Á sama tíma er fækkun í heilbrigðisgeiranum og ekki hægt að borga fólki mannsæmandi laun og það flytur unnvörpun úr landi.  Jafnframt er þrengt svo að fjarhag heilbrigðisstofnana um allt land, að liggur við öngþveiti.

En þetta eru ráðherrar Almennings í Reykjavík
, aðrir geta étið að sem úti frýs. 


mbl.is Skiptar skoðanir um staðsetningu nýs sjúkrahúss
Tilkynna um óviðeigandi tengingu við frétt

Innanríkisráðherrann í Reykjavík....

...skilur ekki þarfir landsbyggðarinnar og enn síður hvar hentar að vera með aulafyndni og hvar ekki.

Landsbyggðarmálin ætti í heild sinni að færa til Landbúnaðarráðherra, og það ráðuneyti í framhaldinu skírt Landsbyggðar- og landbúnaðarráðuneytið.

Seint verður hægt að flokka landsbyggðar sem utanríkismál, þó það hentaði landsbyggðarmönnum jafnvel betur, en að vera háðir duttlungum Innanríkisráðherrans í Reykjavík.  Ráðherrans sem virðist ekki átta sig á því, að bættar samgöngur komi innanríkismálum eitthvað við. 

En honum er full vorkun.  Þetta er svo óralangt frá haugnum hans í landnámi Ingólfs heitins Arnarsonar. Nokkrar hríslur eiga hins vegar alla hans samúð og er það vel.  Það má ekki vera vondur við pínu litlu krúttlegu hríslurnar.  Ekki má fórna þeim fyrir málstað íbúa á Vestfjörðum.  Hríslur, sem að mati ráðherrans og sumra annarra, eru mjög heilagar.  Þetta samrýmist fullkomlega trú búskmanna í Afríku að tré séu heilög.   

En, - það á ekki að gera lítið úr búskmönnum í Afríku né indverjum með sínar heilögu kýr, þegar þarf að stóla á mann sem heitir Ögmundur Jónasson?
mbl.is Gengu af fundi með Ögmundi
Tilkynna um óviðeigandi tengingu við frétt

Hva...!!! er þetta ekki Kárahnjúkaryk...!?!?!

Rosalegir þessir Kárahnjúkar, að valda líka sjónrænum vandamálum ofan á geðræn vandamál sem undanfarin ár hafa plagað rosalega suma borgarbúa.  Whistling

Hvað segir náttúruvaktin við Efstaleiti við þessum tíðindum?


mbl.is Svifryk frá Langjökli í borginni
Tilkynna um óviðeigandi tengingu við frétt

Sjoppumenning Framtakssjóðs

vopnafarðarhreppur.is:

"Efnahagshrunið hefur leikið Ísland grátt og þó jaðarbyggðir Íslands hafi búið til takmarkaðan skilning ráðamanna fyrir hrun hefur sá skilningur farið þverrandi enda eiga menn fullt í fangi með að þoka hjólum efnahagslífsins á höfuðborgarsvæðinu áfram.

Að þar ríki gróska er lykillinn að efnahagsbata landsins en það er sárt til þess að vita að þegar lítið samfélag, sem hefur af eigin hvötum unnið hörðum höndum að nýsköpun iðnaðar, skuli mæta fullkomnu skilningsleysi frá hendi þess aðila sem skilur á milli feigs og ófeigs viðvíkjandi raungerð tiltekins verkefnis.

Seyðfirðingar hafa fengið þau skilaboð að Framtakssjóður Íslands styðji þá ekki í viðvíkjandi uppbyggingu álvíraverksmiðju."

Framtakssjóður getur núna keypt hlut í N1, sem er nánast gjaldþrota og Húsasmiðjuna, sem er í sullandi í sama feninu.

framtakssjodur.is:

"Markmið FSÍ um samfélagslega ábyrgð

8. Stjórn FSÍ og starfsmenn hans eru meðvitaðir um þá ábyrgð sem fylgir því að ráðstafa fjármunum hluthafa FSÍ, sem eru almannafé, og taka jafnframt tillit til samfélagslegrar ábyrgðar í rekstri fyrirtækja.  FSÍ tekur ekki þátt í fjárfestingum sem orka tvímælis út frá almennum siðferðisreglum."

Hafa stjórnarmenn haft 8. grein að leiðarljósi?

Framtakssjóður var ekki til þegar verið var að virkja við Kárahnjúkana, en það voru lífeyrissjóðirnir hins vegar sem standa nú að Framtakssjóði.  Hver var þáttur þeirra í Kárahnjúkavirkjun?  Enginn minnir mig.  Kárahnjúkavirkjun malar nú gull.

Lífeyrissjóðirnir eru hins í því að sópa upp gjaldþrota fyrirtækjum og redda þeim með því að eyða í  þau almannafé.  Það er ekki flókið verk, svo framarlega að þau fyrirtæki séu stödd í landmnámi Ingólfs heitins Arnarsonar.


mbl.is Framtakssjóður kaupir hlut í N1
Tilkynna um óviðeigandi tengingu við frétt

Gott fordæmi og traust fólks á Huang.

Ljóst er að fólk lætur úrtöluraddir og samsæriskenningar lönd og leið.  Fólk er upplýstara en það, en að láta slíkt slúður og þvælu hafi áhrif á sig.  Fólk er það skynsamt að það er tilbúið að skoða hlutina frá ýmsum hliðum og taka síðan upplýsta ákvöðun um mál og málefni.

Því miður eru alltaf til einstaklingar sem sjá drauga í hverju horni og eru eins og uppvakningar frá miðöldum.  Frá þeim tíma, sem prestar og prelátar voru alsráðandi um þankagang fólksins og í krafti stöðu sinnir gátu logið söfnuð sinn stútfullan á sunnudögum, með hótunum og hræðsluáróðri. 

Þessi staða kemur enn upp af og til, þegar einhverjum predikaranum tekst vel upp í samsæriskenningum, en þeim tilfellum fer sem betur fer fækkandi.  Sitjandi stjórnvöld reyndu t.d. í tvígang að koma í gegn Icesave hryllingnum með ósannindum, hótunum og þvælu.  En þjóðin lét ekki slá sig út af laginu.

Til hamingju Ísland.

mbl.is Meirihluti hlynntur sölu til Huang
Tilkynna um óviðeigandi tengingu við frétt

Sannleikanum er hver sárreiðastur.

Það eiga stjórnarliðar erfitt með að kyngja.  Verst að þau skulu ekki læra af reynslunni og snúa sér að því óskipt, að vinna heimavinnuna sína og smyrja hjól atvinnulífsins og koma heimilunum út úr myrviðum skuldafensins.  

Hætta við umsóknarferlið að ESB.  Evrópa vill okkur ekki og við viljum Evrópu ekki. 

Örfáar undantekningar eru þó á því.  Það borgar sig að veita þeim einstaklingum ferðastyrk inn í "sælureitinn sinn", svo við hin getur fengið að þroskast hér í friði.
mbl.is Gangi inn í umræðu af ábyrgð
Tilkynna um óviðeigandi tengingu við frétt

Pólitískur skrípaleikur,....

....sem lítið á skylt við réttlæti og óhlutdrægni.  Það eitt hvernig Alþingi tók þá ákvörðun um hverja átti að lögsækja og hverja ekki, setur málið í þannig stöðu að ákæran ber óhjákvæmilega mjög sterkan keim af pólitískum ofsóknum.

Annað hefði verið upp á teningnum, ef allir sem ásakaðir voru, hefðu nú stöðu grunaðra.  Alþingi rústaði málatilbúningi öllum og því ber að vísa málinu frá.
mbl.is „Liðist ekki í öðru sakamáli“
Tilkynna um óviðeigandi tengingu við frétt

Viðskiptalegir hagsmunir eða mútur?

Lilja Mósesdóttir er með vinkil á Grímsstaðaævintýrinu, sem hægt er að kaupa.  Í þeim vinkli felast einning tækifæri, ef rétt er haldið á spilunum.  Huang Nubo gerir sér fulla grein fyrir því að andstaða er talsverð við þau áform hans að kaupa jörðina.  Hann hefur sótt um undanþágu að kaupa.

Það sem hins vegar vekur athygli, er dónaskapur ráðherra í garð mannsins.  Umsvifalaust er settur upp valdsmanssvipurinn og bent á það á hrokfullann hátt að ekkert sé gefið í þessu sambandi.  Bloggarar hafa einnig verið iðnir við kolann að draga mannorð Huang Nubo niður og bera þar fyrir sig hálfkveðnar vísur og Gróusögur.  Rétta andrúmsloftið er auðvita að koma jákvætt fram og sýna kurteisi. 

Þar sem undanþágu þarf að veita fyrir kaupunum, er ekkert óeðlilegt við það að eitthvað meira fylgi með í kaupunum af hendi kupanda.  Það er tvíþætt.  Í fyrsta lagi ef málið er mjög áhugavert og líklegt til að skila kaupanda talsverðum ágóða, er ekkert óeðlilgt svæðið sé metið hærra fyrir vikið, til að undanþága komi til greina.  Í öðru lagi að vekja ekki of miklar væntingar hjá þeim sem á eftir koma, m.ö.o. að það sé ekki sjálfgefið að grípa til undanþágu, nema ríkir hagsmunir fylgi.   Auk þess verði settar verði strangar skorður um verkefnið og það lúti ótvírætt íslenskum lögum.

Spurningin til Huang Nubo er því, hvað er hann tilbúinn til að gera til að verkefnið skili aukinni veltu og umtalsverðum tekjum inn í samfélagið.

Svo geta menn rifist endalaust um það hvort þetta eru viðskiptalegir hagsmunir eða mútur?



Vandamál að vera austan við 17° vestur.

Oft veltir maður fyrir sér hvað þarf til brunns að bera til að vera gjaldgengur innan og saman við erkefni samtímans, sérstaklega ef eitthvað þarf að byggja upp út um hinar dreifðu byggðir.  Lítum á nokkur dæmi.

Dæmi A:  Háværar kröfur hafa verið uppi um að hafa staðsettar sjúkraflugvélar á Ísafirði og í Vestmannaeyjum Nokkrum sinnum hefur verið orðið við því, en ekki hefur verið hlustað á þau rök austfirðinga, sem er þó lengst frá tæknivæddu sjúkrahúsunum í Reykjavík.Austurlandið liggur austan við 17°vestur.

Dæmi B:  Þegar byggt var við flugstöðina á Keflavíkurflugvelli, voru smíðaðir hallandi veggir til að "lúkka" við ílla ígrundaða hönnun Leifsstöðvar.  Ekki einasta er þetta fokdýrt, heldur kallar þetta á endalaus vandamál við frekari stækkun.  Skásettir útveggirnir auka loftrými flugstöðvarinnar umtalsvert á kostnað gólfplássins, svo nemur hundruðum fermetra.  Hver er tilgangurinn.  Fegurðarsjónsmið.  Á svipuðum tíma mátti Ferjuhöfnin á Seyðisfirði  sæta því, að hver einasti aukafermillimeter var skorinn í burtu, sem nokkur smuga var á að skera.  Húsið var því strax of lítið og krubbulegt, önugt  fyrir starfsemina og skoðun á stærri bílum þurfti að fara fram utan dyra.  Síðar var ljótum kassa bætt við húsið til skoðunar á stærri ökutækjum.  Þá voru öll fegurðarsjónamið látin lönd og leið.Enda Seyðisfjörður austan við 17° vestur.

Dæmi C:  Stórt menningar- og ráðstefnuhús er nú risið við höfnina í Reykjavík og þar var engu til sparað, nægu fjármagni til að dreifa og ekkert skorið við nögl.  Þegar stóru verkefni um álver og virkjanir var hrint í framkvæmd á Mið-Austurlandi, voru fjármunir af skormum skammti settir í að styrkja þá vegi, sem mestu þungaflutningarnir fóru um frá Reyðarfirði að Kárahnjúkum.  Ekkert fjármagn fannst til að hægt væri að breikka tvær einbreiðar brýr á Fljótsdalhéraði eða endurbæta vegstubb í Vallahreppi, sem er að hverfa þar ofaní drulluna.  Þaðan af síður fannst fjrmagn að leggja í og bæta sjúkraskýlið á Egilsstöðum, þrátt fyrir mikla aukningu starfsmanna á svæðinu.   Mið-Austurland er að mestu austan við 17° vestur.

Dæmi D: 
Stórkallalegar og fáránlegar hugmyndir eru uppi um byggingu ofursjúkrahúss við Hringbraut.  Þessi áform eru ekki í nokkru samræmi við heilbrigðismálin í heild sinni né núverandi stöðu ríkissjóðs hvað þá að vera í einhverjum takti  við heilbrigða skynsemi.   Það virðist hins vegar ekki hamla framkvæmdagleðinni né virðist skortur á fé vera vandamáli í þessari óraunhæfu spilaborg.  Á sama tíma er fækkun í heilbrigðisgeiranum og ekki hægt að borga fólki mannsæmandi laun og það flytur unnvörpun úr landi.  Síðan er þrengt svo að fjarhag Heilbrigðisstofnunar Austurlands, að liggur við öngþveiti. 

Ögmundur Jónasson innanríkisráðherra í Reykjavík fór í utanríkisferð til Austurlands á dögunum.  Þar upplýsti hann, tárvotum augum , að ríkiskassinn væri svo rosalega alveg  galtómur, að ekki væri nokkur leið hefja jarðgagagerð milli Eskifjarðar og Norðfjarðar (Oddskarðsgöng eru 632 m.y.s.), þrátt fyrir samþykktir Alþingis.  Ekki var vikið einu orði að því, að verið var að setja Vaðlaheiðargöng í útboð á þessum sömu þrengingatímum (Víkurskarð er 325 m.y.s.).  En auðvita sjá allir hugsandi menn, hve mikill faratálmi Víkurhóll (eða - skarð) er í þessu samhengi.  Aðalsjúkrahús austfirðinga er bara illa aðgengileg  og liggur stofnunin á snotrum stað þar sem heilu fjallasalirnir umlykja hana.  Aðkomurnar eru tvær, af sjó og yfir hæsta fjallveg Íslands.  Og til að vera alveg heiðarlegur þá er þar einnig malarflugvöllur sem er fær, - stundum. En skýringin er náttúrulega alveg morgunljós.   Austurland er að mestu austan við 17° vestur.

Dæmi E:  Stórtæka hugmyndir um uppbyggingu í ferðaþjónustu á Grímsstöðum hefur verið fyrirferðamikil í fjölmiðlum og í boggheimum síðustu dagana.  Þar sýnist sitt hverjum.  Hér er ágætt dæmi um að gera eitthvað annað, sem er eina hugmynd VG í atvinnuuppbyggingu landsins.  Það stendur hinsvegar alveg þversum í meltingavegi þeirra af óskiljanlegum ásæðum.  En þegar grannt er skoðað er, nefnilega.... hérna..... hér,......-

....Grímsstaðir  austan við 17° vestur.

Þetta eru bara smá sýnishorn.  Niðurstaðan.  Þeir sem búa austan við 17° vestur er afgangsstærð, - nema í  kosningum og til að afla gjaldeyris. 


Það er þroskamerki að geta skipt um skoðun...

...ef rök eru fyrir því.  Hins vegar þarf að setja í landslög hvaða jarðir og svæði má selja og hvað ekki. 

Hópur bloggara hafa farið hamföum á netinu og hafa dregið heilindi þessa kínverska fjárfestis í efa, og þá tek ég vægt til orða.  Þeir hika ekki við að slá fram staðlausum stöfum og enginn hörgull er á samsæriskenningum þessa hóps.

Þessi umræða ber mjög keim af hliðstæðu máli, þegar verið var að virkja við Kárahnjúka.  Þá voru ítalirnir sem urðu fyrir aðkasti í bloggheimum.  Stórfyrirtækið Impregilo var þá í sporum Huang Nubo.  Bloggarar settu Impregilo á stall með helstu glæpaklíkum heimsins og oftar en ekki var bent á hve illa þeir færu með kínverja.  Þá var samúðin öll með kínverjum.  En, - nú er öldin önnur.  Iprigelio er löngu gleymt, enda til þess að gera, flekklaust fyrirtæki.  Því þarf að finna nýtt fórnarlamb.

Ítrekað var einnig bent á að verkefnið um Kárahnjúka hafi sett allt þjóðfélagið í upplausn, vegna þess að verkefnið þótti vera of stórt fyrir íslenskt hagkerfi.  Ekkert samhengi var hins vegar í bloggheimum um ofvöxt bankakerfisins né að "hagræðingin" í þeim herbúðum hefði átt þar nokkurn þátt í skekkja heildarmyndina.  Fráleitt var einnig talið að sjúkleg framkvæmdagleði verktaka í landnámi Ingólfs heitins Arnarsonar, hefði þar nokkur áhrif á þenslu og fráleitt var að það hringdi nokkrum viðvörunarbjöllum í bloggheimum.

Niðurstaða mín er því sú.  Ef á að gera eitthvað úti á landi, þá er það "eitt alsherjar samsæri".  Ef eitthvað á að gera í áðurnefndu landnámi, þá eru það "eðlileg framvinda".

Er ekki tímabært að hleypa Reykvíkingum úr þessari meintu ánauð þeirra vegna vandamála landsbyggðarinnar og gefa þeim fullt frelsi og sjálfstæði með landamærastöðvum, eins og borgastjóri þeirra boðaði í aðdraganda síðustu sveitastjórnakosninga.   Mér fannst þetta fráleitt hjá viðkomandi frambjóðenda og núverandi borgarstjóra, - en nú er ég búinn að skipta um skoðun. 
mbl.is Ólafur Ragnar skipti um skoðun
Tilkynna um óviðeigandi tengingu við frétt

Innskráning

Ath. Vinsamlegast kveikið á Javascript til að hefja innskráningu.

Hafðu samband