Lagarfljótsormurinn. Hollvinasamtök??

Ferðaþjónustan á Íslandi er á brauðfótum, í flestum geirum þess.  Nokkur lifa allgóðu lífi, en meðaltalið er slæmt, - mjög slæmt. 

Nú er rekstur farþegaskipsins á Lagarfljóti í uppnámi, - enn eina ferðina.  Vandamálið má rekja til upphafsins, þegar Byggðarstofnun sveik gefin fyrirheit og í stað hlutafjár upp á tíu mílljónir, var veitt lán upp á þá upphæð.  Ferðamálasjóður drap svo fyrirtækið endanlega með óbilgirni og þröngsýni þeirra sem þar réðu ferð.

Núverandi eigendur hafa ekki flegið feitan gölt í verkefninu og ferðamannatíminn er það stuttur, að rekstur þessa verkefnis verður seint arðbær og þarf því stuðning af einhverjum toga.

Þá veltir maður fyrir sér hvað er til ráða.  Eitt kemur upp í hugann.  Það er að stofna hollvinasamtök Lagarfljótsormsins og sýna samhug í verki.  Ekki einasta væri það verkefni samtakanna að finna fé til að tryggja rekstur, heldur væri einnig hægt að koma að verkefninu með því að leggja hönd á plóg, því ýmislegt fleira er hægt að gera, en að leggja því fé.  T.d. þarf á hverju vori að þrífa skipið hátt og lágt og mála yfir hluti, sem hafa látið á sjá yfir veturinn. Bryggjur þarf að laga og snyrta umhverfi hafnarinnar.

Eru menn og konur, tilbúin að koma að þessu verkefni og freista þess að það stöðvist ekki.  Farþegaskip á Lagarfljóti er eina skipið, sem er gert út á ferskvatni á Íslandi, og væri sjónarsviftir af því að það hætti að sigla um með ferðamenn.  Líkur eru á að komandi sumar verði "fengsælla" en fyrri ár, vegna kreppunnar og af hennar sökum munu fleiri skoða eigið land.

Er einhver með góðar tillögur, sem hrinda má í framkvæmd í tengslum við þetta verkefni????

 

 

Athugasemdir

[Gerður Pálma, 12.3.2009 kl. 16:49]

Ég var að rekast á þessa grein þína og hef mikinn hug á að skoða þetta mál nánar í Landsverkefni um ferðmál. Þetta er nákvæmlega ástæðan fyrir því að nú er verið að selja landið til Rio Tinto það hafa aldrei verið skoðuð virt og VIRKT hugvit og mannafl í landinu. 

Ég þakka ykkur öllum sem standið í þessari baráttu.

[Gerður Pálma, 12.3.2009 kl. 17:27]

Nú í atvinnuleysinu ætti að vera ánægjuefni fyrir fjölda manns að gera sér ferð austur, hafa góða veislu og taka til hendinni saman.  Hægt væri að leggja inn vinnutíma sem borgist t.d. í að fá að fara í siglingu í sumar, fyrir inneignina.  Ég á eftir að fá meiri upplýsingar um starfsemina áður en ég get komið með fleiri hugmyndir.  Ég rek ´concept creation´fyrirtæki í Hollandi, og vil gefa mína reynslu og krafta hérna heima ef það er þegið.  Skapa stemmingu við að taka til þar sem tækifærin liggja.   

[(IP-tala skráð) 12.3.2009 kl. 18:11]

Ég skal koma og þrífa og mála, bara láta vita.