Besti landsbyggðaflugvöllurinn.

Það er pólitísk ákvörðun Kristjáns Möller að leggja fé í flugvöllinn á Akureyri, í stað þess að bæta þann besta sem er á Egilsstöðum.  Það hentaði hins vegar ekki pólitísku landsvæði ráðherra Samfylkingarinnar að ráðast í að ljúka því verki sem hafið var á Egilsstöðum.  Það má einnig benda á að hreppsnefndin á Egilsstöðum hefur ekki verið sérlega lífleg að halda ráðherrum samgöngumála við efnið.  Akureyrarflugvöllur hefur ekki tærnar þar sem Egilsstaðaflugvöllur hefur hælana í flestu tilliti. 

Aðflug að flugvellinum á Egilsstöðum er nothæft í báðar áttir.  Fjöll eru ekki vandamál eins og á Akureyri og í raun má segja að það er hæð fjallanna sem eru akkilesarhællinn á Akureyri, ekki lengd flugvallarins.

Ég hef fjallað áður um flugmál m.a. eftirfarandi:

Mikilvægt er að mörkuð verði ákveðnari stefna í flugmálum og ekki skipt takmörkuðu fjármagni í marga staði á sama tíma.  Fara verður vel með fjármuni skattborgaranna og velta því yfirvegað fyrir sér, hvað kemur best fyrir samfélagið í heild. 

Eins og fram kemur hér á blogginu, var við undirbyggingu núverandi flugbrautar á Egilsstöðum, gert ráð fyrir lengingu í 2700 metra og frumhönnun verksins er til á teikniborðinu hjá Flugstoðum ( áður Flugmálastjórn) og aðstæður eru ákjósanlegar frá landfræðilegu sjónarmiði. 

Stöðugt er verið að knýa á um að bætt öryggi á millilandaflugvöllum.  Gerðar eru auknar kröfur um dýran öryggisbúnað til að mæta því, m.a. með því að gegnumlýsa allar töskur, handfarangur og skoðun á farþegum.  Auk þess þarf fullkominn og dýran búnað til að hlaða og afhlaða stórar flugvélar, bæði í farþega- og fraktflugi. 

Ljóst er að ekki verður grundvöllur til þess að margir flugvellir verði þannig búnir, vegna mikils stofnkostnar, í þrjúhundruð manna samfélagi.  Hverjum flugvelli fylgir einnig mikill kostnaðar við að þjálfa starfsfólks og búa flugvellina viðeigandi tækjakosti og síðan fylgir rekstrarkostnaðar og viðhald á tækjum og búnaði. 

Hér þarf að forgangsraða og ljúka því sem byrjað er á, ella stöndum frammi fyrir því að við höfum nokkra flugvelli, sem ekki eru í stakk búnir að geta tekið við þeim flugvélum sem þó gætu nýtt sér Keflavíkurflugvöll.  Stórar flugvélar geta t.d. ekki athafnað sig innan fjallahringsins á Akureyri, sama hve löng brautin þar yrði.

Hvort sem okkur dreyfbýlismönnum líkar það betur eða verr, eru ákveðnar staðreyndir sem ekki er hægt að líta framhjá.  Það er meira fjölmenni á suð-vesturhorninu og þar af leiðandi eru mestar líkur á að auka flug þangað, auk þess er best búni flugvöllur Íslands í Keflavík.   Nýting hans gæti orðið mun betri, við að koma upp góðum varaflugvelli á Egilsstöðum.  

Tækifærin eru þarna úti,- okkar er að grípa þau.  Það kemur öllum landsmönnum til góða.

Rhodos-ferðin hófst í rútu

Athugasemdir

[Haraldur Bjarnason, 20.9.2008 kl. 20:23]

Pelli þú veist að síðustu áratugina hafa Framsóknarmenn ráðið ríkjum hér á landi. Þetta er ekkert sem Möllerinn einn kemur með. Hins vegar vita allir að Akureyrarflugvöllur verður aldrei millilandaflugvöllur. til þess þarf að moka fullt af fjöllum á burtu og jafnvel breyta vindáttum. Þetta er ekki flpkkspólitískt heldur hefur þetta eitthvað með einhverja höfuðstaðamynd að gera. Ekki alls fyrir löngu var ég á fundi þar sem rætt var um ákveðna þjónustu sem átti undir högg að sækja á Akureyri. Þegar það var nefnt að hugsanlegt væri að fytja þessa þjónustu til Egilsstaða sagði Kristján Þ. Júlíusson þingmaður sá fyrsti af íhaldslistanum. Egilsstaðir koma ekki til greina þar er svo fámennt. Þetta er þingmaður Austurlands í dag. - heldurðu ekki að peningar til þessa vonlausa Akureyrarflugvallar eigi ekki rætur í svona hugsun? - Kveðja frá Agureyris

[gambri (IP-tala skráð) 21.9.2008 kl. 10:23]

Eigum við ekki að lyfta umræðunni aðeins upp úr sandkassanum og hrepparígnum.

Í dag eru Egilsstaðir með fína flugbraut, með góðum aðflugsbúnaði, og flugstöð við hæfi. Aðflugsskilyrði eru eins og best verður á kosið. Það er bara eitt sem vantar. Fleira fólk. Það er búið að reyna millilandaflug þaðan en eftirspurnin hefur verið ófullnægjandi. Vonandi  fjölgar íbúunum og þá batnar nýtingin á flugvellinum.

Það hefur hinsvegar verið töluverð eftirspurn eftir millilandafluginu á Akureyri til margra ára.  Nú er verið að bæta rekstraöryggið með því að lengja flugbrautina og setja upp nýjan aðflugsbúnað. Handan við hornið er svo ný kynslóð af leiðsögubúnaði sem mun gera aðflugið ennþá auðveldara og öruggara.

Stór hluti af vandræðunum með þotuflugið er að flugmennirnir eru frá erlendum leiguflugfélögum og ókunnugir og óöruggdir í þessum oft krefjandi aðstæðum. Þarna gæti aukin þjálfun bætt úr. Aðstæðurnar á Akureyri eru langt frá því að vera einstakar eða vonlausar. Það er hægt að gera ýmislegt til að bregðast við þeim og í því er unnið.

Mergurinn málsins er sá, að eftirspurn er eftir reglubundnu millilandaflugi frá Akureyri. Þetta skynja pólitíkusarnir og eftir því er tekið.

[Benedikt V. Warén, 21.9.2008 kl. 13:12]

Halli, - ég skil ekki kommentið með Framsóknarflokkinn hér.   Mér þykir hins vegar vænt um að sjá það  hve ofarlega í huga þinum flokkurinn ávallt er.

Framsóknarflokkurinn var meira og minna í stjórn þegar Egilsstaðaflugvöllur komst á koppinn og hæst ristu farþegatölur hans, þegar verið var að koma fólki milli staða, vegna virkjana og álvers.  Þökk sé Valgerði Sverrisdóttur.

Nú er öldin önnur og Möllerinn ætlar ekki að klára það sem lagt var upp með.

Þeir nafnarnir eru samstíga í að leggja allt undir í Eyjafirði, merkilegt að þeir skulu ekki vera í sama flokki, svo samstíga eru þeir.

[Benedikt V. Warén, 21.9.2008 kl. 13:35]

Gambri.

Talsverð eftirspurn hefur verið eftir flugi á svæðinu, en eins og þú bendir réttilega á eru íbúarnir færri en í Ejafirði.  Trúðu því við verðum mjög varir við það á viðbrögðum þingmanna "okkar", þegar þarf að leysa brýn verkefni, hvort sem er í samgöngu- heilbrigðis eða menntamálum.

Rétt væri að það yrði upplýst hver þessi nýja tækni er, sem er handan við hornið.  Ýmsar aðferðir eru nú þegar þekktar og sérstakar flugvélar eru heppilegri við þröngar aðstæður en aðrar. 

Gæti verið það verið skýring, að erlendir flugmenn séu nákvæmari að fylgja reglum, sem settar eru til að gæta fyllsta öryggis í flugi??

Hvað varðar hrepparíginn.  Austfirðingar hafa um áraraðir sótt ýmsa þjónustu á Akureyri s.s. að fara á sjúkrahús, í sérverslanir, til sérfræðinga og sækja æðri menntun.  Aldrei hefur flökrað að neinum íbúa á Eyjafjarðasvæðinu að þetta sé langt fyrir þá og oftar en ekki er þetta talið Eyjafjarðarsvæðinu til tekna, að Austurlandið sé rétt handan Vaðlaheiðarinnar. 

Í þeim ótöldu ferðum sem undirritaður hefur farið milli Egilsstaða og Akureyrar hefur hann komist að þeirri hávísindalegu niðurstöðu: - það er jafn langt í báðar áttir. 

Það er því hægt með stolti að bjóða Eyfirðinga sem og aðra flugfarþega, hjartanlega velkomna í Egilsstaði til að notfæra sér besta flugvöll á landsbyggðinni til millilandaflugs.

[gambri (IP-tala skráð) 24.9.2008 kl. 23:35]

Pelli,

Það vantar meiri bjartsýni hjá þér.

Það er ekki tilviljun að það koma 80 skemmtiferðaskip til Akureyrar á sumri.

Það er heldur ekki tilviljun að það er grundvöllur fyrir millilandaflugi frá Akureyri. Það hafa fjölmargir aðilar unnið að þessu árum saman, og ekki gefist upp þótt að á móti hafi blásið. 

Það var staðið myndarlega að endurreisn flugvallarins á Egilsstöðum á sínum tíma, sem var vel.  Núna er hinsvegar komið að því að bæta aðstæður við Akureyrarflugvöll eins og kostur er. Í stað þess að sjá ofsjónum yfir því, þá tel ég að þú ættir frekar að beina sjónum þínum að Reykjavíkurflugvelli, sem á mjög í vök að verjast um þessar mundir.

Varðandi þína hávísindalegu niðurstöðu, þá áttu alla mína samúð. Ég held að flestir sem búa úti á landi, hafi upplifað þetta sama, á einn eða annan hátt.

GPS/Galileo nákvæmnisaðflug er handan við hornið og mun nýtast mjög vel við aðstæður eins og í Eyjafirði.

Svo hef ég alltaf fundið mig hjartanlega velkominn á Egilsstaðaflugvelli

[Benedikt V. Warén, 25.9.2008 kl. 18:09]

Gambri.

Hvernig virkar GPS/Galileo nákvæmnisaðflug í sterkri sunnan átt fyrir flugtak á Akureyri??  

GPS/Galileo er ekki komið í gagnið enn og einhver ár í það.  GPS/Galileo kerfið er byggt á sömu tækninni og það GPS kerfi sem við erum að vinna með núna, en er eingöngu búið til og er á ábyrgð Evrópubúa á meðan hitt er Amerískt.   Nú þegar er búð að koma upp eftirlistsstöðvum með GPS kerfinu, sem kallast EGNOS og mun vinna á GPS/Galileo þegar þar að kemur.  Þessi tækni er semsagt ekki ný eins og þú heldur fram.

Hver er annars hámarks meðvindur fyrir flugtak á B737-700??

Var ekki nær að skoða flugvallarstæðið á Húsavík, þar sem Vaðlaheiðargöng eru handan við hornið hjá Möllernum??  Þar eru fjöllin ekki að trufla flug, enda er það oftar geta flugvélanna sem takmarka flug en tæknin.  Síðan er alltaf spurningin um hvort ekki er betra kapp með forsjá þegar að fluginu kemur.

Í lokin, skil ég ekki viðkvæmnina í þér, að geta ekki komið fram undir réttu nafni.

[gambri (IP-tala skráð) 28.9.2008 kl. 01:25]

Pelli,

Lengri flugbraut, betri aðflugsbúnaður og  bætt þjálfun flugmanna vegna krefjandi aðstæðna í Eyjafirði, mun auka rekstraröryggi Akureyrarflugvallar.

Auk millilandaflugsins, þá mun innanlandsflugið og ekki síst sjúkraflugið, njóta þess einnig.

Það verður hinsvegar seint hægt að ná rekstrarörygginu í sama horf og er t.d. í Keflavík eða á Egilsstöðum vegna nálægðar fjalla. Það má samt bæta umtalsvert frá því sem nú er.

Jafnan um arðbæran flugrekstur inniheldur nefnilega fleiri þætti en gott aðflug og góða flugbraut. Sem betur fer þá hefur fjölbreyttur og myndarlegur flugrekstur dafnað á Akureyrarflugvelli til fjölda ára. Bættar aðstæður eru fyllilega í takt við þá starfsemi.

Held að Kristján Möller og aðrir þingmenn okkar skynji þetta ágætlega og vinni samkvæmt því, af nokkru kappi en fullri forsjá.