Kosningaórói Njáls Trausta.

Ekki hafa margir Alþingismenn orðið á vegi íbúa Austurlands undanfarið og ef ekki hefðu komið til hörmungarnar á Seyðisfirði hefði enn minna sést til þeirra á svæðinu en ella.  Covid19 er ekki eina skýringin á fjarveru Alþingismanna og svo merkilegt sem það kann að hljóma, þá er þeirra sárt saknað.  Fátt jafnast á við gott samtal, maður við mann, -  jafnvel við Alþingismann.

Njáll Trausti Friðbertsson er einn þeirra.  Hann er núna hrokkinn í kosningagírinn og búinn að manna skjálftavaktina, enda mikið í mun að haldast inn á þingi.  Hann birtir hverja greinina af annarri um allt sem hann ætlar sér að gera næsta kjörtímabil.  Nánast allt tilheyrir það í Eyjafjarðarsvæðinu. 

Kjósendur á Austurlandi blekktir

Hitt er ekki síðir athyglivert hjá Njáli Trausta.  Hann er að reyna að blekkja kjósendur á Austurlandi.  Af veikum mætti gefur hann í skyn að hann beri einhverja umhyggju fyrir svæðinu og sérstaklega Egilsstaðaflugvelli.  Það er öðru nær.  Ef svo væri hefur hann haft mörg tækifæri til að þrýsta á um endurbætur á flugvellinum.  En það hefur hann ekki gert.  Hann hefur nánast aldrei lagt nokkuð til málanna á Egilsstaðaflugvelli nema að nefna Akureyrarflugvöll í sömu andránni.  Það gerir hann þrátt fyrir að það stefni í að allt að fimm milljörðum verði búið að verja í framkvæmdir á Akureyrarflugvelli frá síðustu aldarmótum, en núll krónum í Egilsstaðaflugvöll.  Þar að auki þarf tvo milljarða til að klára nýju flugstöðina fyrir 2025.

Gott er að eiga hauk í horni fyrir suma a.m.k.

Fyrir Njál er það ekki ónýtt að hafa á sínu bandi, framkvæmdastjóra flugvallasviðs Isavia, Sigrúnu Björk Jakobsdóttur, fyrrverandi bæjarstjóra á Akureyri og flokkssystur.  Það getur ekki klikkað.

Fyrir löngu var búið að nefna veikleika Akureyrarflugvallar vegna hárra fjalla umlykjandi.  Einmitt vegna þeirra var farið í uppbyggingu Egilsstaðaflugvallar og þar auki eru hvað bestar veðurfarslegar andstæður miðað við Keflavíkurflugvöll og gerir hann heppilegastan til að taka við þegar eitthvað truflar rekstur Keflavíkurflugvallar.

Börnin læra það sem fyrir þeim er haft

Rétt er einnig hér að minnast á læriföður Njáls, Kristján Þór Júlísson. Áherslurnar hans voru þrjár í samgöngumálum NA-kjördæmis alls, þ.e. betra vegasamband frá Akureyri til Reykjavíkur, Akureyrarflugvöllur og Vaðlaheiðargöng. Þá sjaldan hann kom austur á land var það til að etja mönnum saman í hrepparíg t.d. þegar hann hvatti menn til að beita sér fyrir að færa þjóðveg eitt svo hann lægi um þéttbýliskjarnana við sjávarsíðuna.  Engu breyttu rök um lengingu þjóðvegarins, sem af því hlytist.  Aðspurður um hvort hann mundi nota sömu rök og beita sér fyrir legu þjóðvegar eitt fyrir Tröllaskaga.  Því svaraði hann engu. 

Öfugt við Kristján er Njáll ekki í náðinni hjá Samherja.  Óljóst er hvort það er kostur eða galli og hæpið að það verði mælanlegt þegar vegin verða saman önnur afrek Njáls fyrir Austurland.

En hvað varðar sjálfstæðismenn austan Vaðlaheiðar, ættu þeir alvarlega að hugsa sinn gang, þegar kemur að því að velja þingmannsefni á lista flokksins.