Fyrirbærið Þingheimur

Ekki er annað hægt en að vera hugsi á vinnubrögðum starfsmanna okkar á þingi, -alþingismannanna. 

Stöðugt er verið að skera við trog alla starfsemi í heilbrigðisgeiranum, spara og segja upp fólki.  Sérstaklega er sitjandi ríkisstjórn iðin við að leggja niður kvennastörf á landsbyggðinni.  Það ruglar þingmenn samt ekki hætis hót í ríminu og þeir fylkja sig að baki fáránlegra hugmynda um að byggja ofursjúkrahús við Hringbraut.  

Þessi áform eru fráleitt í samræmi við þann barlóm sem stöðugt skekur veggi Alþingishússins innan frá,  né er þetta í takt við skref ráðherra heilbrigðismála í niðurskurði og fráleitt að þetta sé gerlegt vegna stöðu ríkissjóðs og síðast en ekki síst, ekki í nokkrum  takti við heilbrigða skynsemi.   

Ef þessu verkefni verður hrint í framkvæmd núna, lýsir það eingöngu því, alþigismenn eru ekki starfi sínu vaxnir.  Skipta þarf þeim ÖLLUM út.  Það verður að slá á flottræfilsháttin og ýta þessum hugmyndum út af borðinu á meðan staða ríkissjóðs er jafn slæm og fréttir herma.

Það er víðáttu vitlaust að hefja milljarða framkvæmd á sama tíma og samdráttur og fækkun er í heilbrigðisgeiranum og ekki til fjármunir til að borga fólki mannsæmandi laun.  Veit þingheimur ekki að fólk úr heilbrigðisgeiranum er að flytja unnvörpun úr landi?

Það þarf örugglega meira en harðsoðið egg í hausinn, til alþingismenn sjái þetta í samhengi að ríkissjóður er einn kassi, - og það galtómur.  

Alþingismenn virðast lítt tengdir við fólkið utan veggja Alþingis, eru í sínum eigin hugarheimi, - ÞINGHEIMI.

Sár niðurskurður